നീ

തിരയൊടുങ്ങാത്ത
സ്നേഹാവേശത്തില്‍
തല തല്ലി ചാകരുതെന്നും
അറ്റം മുട്ടാത്ത ആകാശത്ത്
അലസം പറക്കുന്ന കിളികളെ
... കണ്ടു മോഹിക്കരുതെന്നും
വസന്തം വിരിയുന്ന വെഞ്ചാമര-
കാറ്റില്‍ ആടിയുലയരുതെന്നും
ഒറ്റക്കാലന്‍ കൊറ്റികളെയും
കോങ്കണ്ണന്‍ കാക്കകളെയും
കൂട്ടുകാരാക്കരുതെന്നും
പല വര്‍ണ്ണങ്ങളില്‍ ചിത്രം രസമില്ലെന്നും
നീലാകാശത്തും നീലകടലിലും
ഒരു തരി പോലും ബാക്കി വെക്കാതെ
അലിഞ്ഞു ഇല്ലാതാവണമെന്നും
നീ മാറോടണച്ചു പറഞ്ഞപ്പോള്‍
ഞാനൊരു ഉപ്പുകല്ലാവാനുള്ള നീറ്റലിലായിരുന്നു